Mien vraauw haar t al n poar moal tegen mie zegt, koop die toch ook zo'n mobieltje. Hardstikke makkelk, bist altied te berieken en astoe zulf wat hest kinst ook noar elkenain bellen. Dat lèste zee mie wel wat. k Was de zeuventeg al passeerd en bruukte elke dag mor weer hoge blouddruktebletten. t Haart kon zo mor kuren vertonen en den was zo'n mobieltje n uutkomst. As t haart din meroakels muik, hup mobieltje der bie en din dokter mor bellen. Joa, k zag t veurdail wel in van zo'n ding, zo'n haandproater.

k Haar al veur zo'n primafoonwinkel stoan. In winkel aalmoal van dat glad jonkvolk.
k Kon mien kinder ook vroagen hou of zo'n mobieltje waarkte. Mor ook dat zinde mie nait. Opains haar k heldere gedachte. Mien klaainzeun, Erik! t Jong was net dattien worden. Van zien pabbe en moeke haar op zien verjoardag n nè mobieltje kregen. Dat kwoajong kon mie mooi even uutleggen hou of zo'n mobieltje waarkte. As zien pa of moe mie uutleg zollen geven, wuir t allent mor gekekel.

Toun k mien klaainzeun beld haar, deur de normoale tillefoon, was e de volgende dag vlot bie mie, mit zien mobieltje.
"Leg mie es uut hou of zo'n ding waarkt", vruig k de knuppel. "Heel gemakkelijk opa", zee e.
t Jong kon mien Knoalsters wel verstoan, mor zulf plat proaten, ho mor.
"U kunt er eentje aanschaffen met een pre-paid kaart of met een abonnement".
"Das nait zo belangriek", zee ik, "mit dij knoppies, dat most mie uutleggen".
t Jong legde mie geduldeg uut woar de knoppies veur dainden. Ook gaf e aan dast in t geheugen van t ding de belangriekste nummers konst opsloagen. Nuver, noar zuiken de D indrukken en k haar de dokter der veur. Noar zuiken en O indrukken en k haar mien vraauw, oma, der veur. Knap zo as hai mie t uutlegde, mor t doezelde mie van de knoppies dij k bruken mos.
"k Mout dat aalmoal opschrieven aans vergeet k dat aalmoal", zee k wat sloereg.

"U kunt ook SMS'en", zee t kwoajong tegen mie. Op mien vroag veuruut lopend zee e: "Dat is briefjes per mobiel verzenden, opa".
"Braivies versturen deur zo'n proatörgeltje terwielst proaten kinst?".
Verbaldereerd keek k hom aan. Dat wast nèste wat ik de loatste tied heurd haar.
d' Omgekeerde wereld. "Din kin k ook wel gewoon n braif sturen toch?"
t Jong keek mie wat twievelachteg aan. "Met die knoppies kunt u een bericht in toetsen en de ontvanger kan dat bericht dan lezen, dat is goedkoper dan bellen".
Hai luit mie t zain. Op t schaarmpie van zien mobieltje verschenen letters. k Kon dudelk lezen: 'ff w88'.
"Wat staait doar nou?", vruig k mien klaainzeun.
"Dat is SMS taal, opa", zee t jong.
"Even betekend ff en w88 is wachten. Zo zijn er nog meer afkortingen te bedenken".
Hai luit mie nog meer veurbeelden zain. k Kon der gain taauw meer aan vaste knuppen. t Jong zag aan mie dat mien intrezzen veur t mobiel gebeuren in rap tempo wegglee.
"Er zijn ook mobieltjes voor senioren, opa, met maar drie toetsen, of knoppies zoals u zegt".
"k Geleuf t wel mien jong, t is mie te stoer. En as mien tied komt zel de duvel zuk ook nait loaten tegenholden deur n SMS-je van ff w88".

                                           -.-.-.-.-.-.-.-

De pries woar k mainst groots op bin, kreeg k aanlangt deur n e-mailtje op 23-04-2009 van n schooljuffraauw uut Sibboeren. Zai vertelde dat n wichtje van heur school, Brenda van der Laan, mitdoan har mit de Grunneger veurleeswedstsried veur kinder. Zai har d'eerste pries wonnen mit t verhoaltje FF w88 van Lou Meijer. Nummer ain van de pervinsie!

Naar boven
Terug