"Dat was eerguster ook wat, Derkie hé", zee de jonge dainder. t Jong haar zotterdag n middagdainst draait ter-wiel Derkie as chef de rol van hulp-officier van justitie haar vervuld.
"t Liekt mie beter astoe dat nait aan de grode klokke goist hangen", zee Derkie zuneg, "dizze haalfmalen vertellen ales deur".
t Jong luit zuk nait weerholden en stak van wale.
"k Haar om vief uur bie V&D twij schiere boetenlandse vraauwlu arresteerd veur winkeldaifstal", begon t jong wat groots.
"Dij vraauwen binnen n aan de Roademaarkt onner touzicht van de chef", en hai keek wat gemain noar Derkie, "in de cel stopt. De aine vraauw wreef zuk aal mor over de buuk en zee aalmoar weer 'Bébé, malade'.
k Zee tegen de chef, dizze Derk dus, dat betaikent in t Frans 'zaike poppie".
"t Klonk slim genog", vuil Derkie in, "k wos nait wat k der mit aanmos. Toun ze in cel op berre lag, bleef dat mìns mor jammern. k Heb heur n beker wotter geven. Omdat k older bin en veul van kinder kriegen òfwait, heb k t jong in deure posteert en heb k de vraauw heur rokken optilt".

Bie dij gedachte kreeg Derkie nou nog n rooie kop.
"k Dee dat om te kieken of heur vlaizen meschain broken wazzen".
"Most der ook even bie vertellen dat t wicht gain onder-boksem aan haar", zee t jong. "Kon aan dien kop zain dastoe die röt schrokst".
"Nou in elks geval wazzen de vlaizen broken, want zai haar aalmoal wotter tussen de bainen. k Heb heur doadelk mit zaikenwoagen naor t zaikenhuus loaten bringen", zee Derkie.
"En nou het ze t kind noar die vernuimd?", vruig aine.
"Nou nee", zee Derkie, "toun k loater op d'oavend noar t zaikenhuus belde, kreeg k te heuren dat mìns al weer vot was. Ze was hailmoal nait zwanger. In cel het ze t bekertje wotter gewoon tussen bainen mieterd".
Wie konnen ons nait meer goud holden en barsten in n doaverend gelag uut.
"Joa tou mor", zee Derkie, "k kin ook nog dattien aangiften in de muide zain, want dat mìns het in t zaikenhuus van de kraomòfdailen van ale patiénten de porremonnees mit nomen".

Naar boven
Terug