Wiekagent drokte op deurbelle. n Ol minske dee deure op n kiere open.
"Ha, plietsie, kom binnen", nuigde ze hom en luip t huussie weer in. De grode wiekagent luip noar binnen.
"Goa zitten, dan tap ik joe n koppie thee in". t Oldske ging drok in keukentje in de weer.
Mit trillende handen zedde ze veur hom n schuddeltje mit n plakkie olwieven en n koppie thee op toafel.
Stěnnend ging ze zulf zitten. "k Heb joe beld om dat ter aalmor bie mie inbroken wordt".
Mit kloare ogies keek ze hom aan.
"t Binnen de noabers dij t doun".
t Oldske revelde mor deur over wat heur de loatste tied aandoan was. n Hail verhoal.
Ňf en tou nikkopte hai van joa of nee en dronk troag zien laauwe, slabbe thee op. Onnerwiel at e zien plakkie olwieven mit klaine happies op.
"Loatste moal hebben ze mien zulvern theeslaifkes mitnomen, dij gaalsters".
Mit n slok thee spuilde hai zien loatste stukkie kouk weg.
"Mor hou kommen dij gaauwdaiven din bie joe binnen? Joe hebben deuren toch goud op de knibbe?"
Ze wees noar t stopketakt aan mure. "Doardeur".
Hai knikte. "t Is goud dat joe plietsie veur zokswat bellen, k heb der wel n oplözzen veur".
Op zien vroag of z'ook plakbaand in huus haar, struunde ze wat in keuken om. Ze gaf hom n plaaister.
Hai ging stoan en plakte de plaaister sekuur over de goatjes van t stopketakt.
"Dij kommen der nait meer in".
t Oldske keek hom bliede aan.
"As der weer wat is, bel mie dan mor weer".
Sikkom elke weke ging e tiedens zien ronde even bie t oldske laangs veur n koppie slabbe thee mit n plakkie kouke en heurde heur verhoalen stilswiegend aan.
d'Inbrekers bleven weg.


Naar boven
Terug