Gustern was der in t Dagblad n verhoal over mie en mien boukie verschenen. Bie t artikel ston n foto van mie van zo'n 35 joar leden, in t plietsie uniförm.
Vandoag ging mien tillefoon en ik nam op.
'Mit Meijer', zee ik.
'Mit Jan Kupers, neeffie van vraauw Kregel', kreeg k as antwoord.
'Moi Kupers, wat kin k veur die doun'.
'k Bel joe even noamens mien tane, vraauw Kregel dus. Zai wil groag even mit joe proaten'.
'Kin zai mie zulf din nait bellen', vruig ik neeffie Jan.
'Dat duuft zai nait. De vroag is of joe heur even willen op tillefoneren. Zai zit in t verzörgenstehuus Betsheda in Sibboeren'.
'Mor woar goit t din over', vruig k verboasd.
'Zai wil n boukie van joe'.
'Mor dat kinstoe toch ook wel veur dien tane bestellen', vruig ik aan neeffie Jan.
'Doar woag ik mien sinten nait aan', zee t neeffie en gaf mie t tillefoonnummer van zien tane.
Ik legde de tillefoon weg en docht bie miezulf dat ter toch wel vrumde lu rondluipen op dizze wereld.

n Poar uur loater schoot mie t gebeuren weer in gedachten en ik toetsde t nummer van vraauw Kregel in.
Der wui direkt opnomen en ik heurde n stemme woar de hekse Eucalypta jaloers op kon wezen; 'Hier mit vraauw Kregel'.
Mien aigen opoe haar net zo'n stemme had en mien gevuilsthermometer schoot votdoalek noar min tien groaden.
'Hier mit Meijer uut Grunnen', wos ik mit muite uut te bringen.
'Ha, de schriever. Ik heb joen stukkie in kraande lezen en k wol geern boukie van joe. De foto van joe heb k ook goud bekeken. Binnen joe traauwd Meijer?'
k Vuilde da'k wat klamme swait op mien veurheufd kreeg. Wat benaauwd zee k; 'Joa, ik bin traauwd'.
'Din magst wel even tegen dien vraauw zeggen dat zai zuk d'haanden dicht mag kniepen mit zo'n knappe kerel'.
Och, wat speet t mie dat k op dizze tillefoon gain luudsprekerknobbe zitten haar, din haar mien vraauw mitluustern kint en haar k t heur nog laange tied onner neuze wrieven kint.
'Dij foto in kraande is wel van 35 joar leden en ik bin dus ook 35 joar older worden', pebaarde ik vraauw Kregel dudelk te mokken. Zai luusterde nait en zee tegen mie;'As joe nog weer n boukie schreven hebben, din most mie even bellen, din ik bestel hom votdoalek. Ook al bin k 86 joar, lezen dou k stomme geern. En t laifste zol k zain as joe hom zulf din even langesbringen. Nou Meijer, bedankt veur t proatje, k stop der nou mit din k mout noar bingo. Tjeu mor weer'.
k Zat wat verbaldereerd noar de tillefoon in mien haand te kieken.
Sjans mit n 86 joarege opoe. Da'k sjans haar as schriever heb k mien vraauw ook even onner de neuze wreven, mor de leeftied van t'olměns heb k der nait bie zegt.
En wat veur wegen ik in de toukomst ook bewandel, Sibboeren loop ik mit n boge omtou.


Naar boven
Terug